لوكان فيك نصيب * غصبا علي الايام طرح اوطيب * ايسير قسمنا
يا اللي غالي غلاك نين مايفداك عندي والي
اوديما ملامح صورتك في بالي واضحات ما لحظه عليه اتغيب
وان كان هو سرح يسرح امعاك خيالي وان كان هو حكي عقلي ايجيب سريب
احكاية غلاك اللي كبر تمالي رفيق اوعزيز او خيرة الصاحيب
امعاك انت نزهي والحياه تحلالي او ما العيش دونك في الحياه ايطيب
يا سبايب نوحي اويا روح جوا ساكنه في روحي
يا ريت يبقي كاتبك في لوحي المولي او من عيني اتكون قريب
وانروق اونبني من جديد اصروحي وننسي شقاي او لوعة التغريب
بيك يا علم يبرن جميع اجروحي اوليش ما ايطيبن وانت لي طبيب
وان كاني اخطيت دناك مو مربوحي بلاك ما عليه اطعمه عمري عطيب
غصبا علي فرقانا ايسير من الدنا لو رايدا مولنا
كنيب خاطري يزهي عقاب زمانا امعاك في الغلا قبلا الراس ايشيب
او كنيبها عيني اللي سهرنا كي الناس تاخذ من المنام نصيب
العالم الله ابما ايسير امعانا سبحانه امقر كل شي تسبيب
دعيته ايجيبك يا عزيز احذانا ربي اوربك ما عليه صعيب
لوكان فيك نصيب * غصبا علي الايام طرح اوطيب * ايسير قسمنا